Zati Mufaad Ya Awaam say Hamdardi

Submitted by Guest (not verified) on Tue, 01/01/2008 - 13:27

Hi meray hum watno!

Ye mulak Pakistan to 14 august 1947 ko ban gaya, laykin ye kabhi bhi aazad naheen ho saka. Iss ko bananay mayn bay intaha khoon baha or aisa baha keh aaj tak ghareeb awaam apnay khoon ki qurbani day rahi hay.Hum nay iss mulak ko Islam kay naam per hasal kiya thaa. Or aaj yeh halat hay hamari keh issi Islam kay naam par hum aik doosray ka gala kaat rahay han. Hamaray buzurgon nay hamayn yeh watane pak iss liye hasal naheen kar kay diya thaa keh kal ko hum apnay he behan bhayon ko kabhi to mazhab kay naam par kaat dayn, or kabhi soobayiat ka libadha orr kar khoon bahayen, or kabhi sayassi mufaad ki khatir khoon ki holi kkhaylayn. Aye Ehle Watan! yeh khoon behta rahay ga, uss waqat tak jab tak hum apni soch ko naheen badal laytay. Mazhabi rahnama, sayassi leader or watan kay dushman anasar hamari masoomiyyat ka uss waqat tak fayedah uthatay rahayn gay, jab tak hum un ki baton par yaqeen kartay rahayn gay. Wo ghalat kehtay han ya sahee, iss ka faisla hum nay khud karna hay or Allah Tuaala nay hamayn akal or shaoor issi liye ataa kiya hay. Aap zaroor inn logon ki batayn sunayn, laykin un par ghor or fikar bhi karayn keh kitni sacchayi ho sakti hay inn ki baton main.Wo qomayn jo hum say baad main azaad huin, wo hum say aagay kyoon nikal gayee han, Wo iss liye keh un ki soch taamiri thi, un qomon nay dil say mehnat ki hay. Man yeh naheen kehna chahta keh hum mehnat naheen kar saktay, hum Allah kay fazal say sub kucch kar saktay han, laykin siraf uss waqat jub hum aapas kay jhaggray khatam kar layn or apnay ird gird mohabbat or bhai charay ki faza payda kar layn, na hum main koi sunni rahay or na koi shiya, na koi qadiyani rahay ho or na koi wahabi, na koi hindu rahay or na koi aisai, na koi sindhi or punjabi rahay or na koi behari or bangali, balkeh hum sub aik ho jayen or hamari pehchan siraf or siraf PAKISTANI ho. Jub hum PAKISTANI ban jayen gay to PAKISTAN bhi ban jaye ga or jub hum apnay jhaggron say azaad ho jayen gay to PAKISTAN bhi azaad ho jaye ga.
Aik hadees main aata hay keh "KISSI BHI KOM PAR WAISA HE HUKMARAN MUSSLLAT KIYA JATA HAY JISS TARAH KI KOM HOTI HAY" Laykin hum to aisay naheen phirr kyon hamayn har 3-4 saal baad nai hakoomat milti hay. Mujhay yaad nahee parrta keh 1947 say lay kar aaj tak kissi bhi hakoomat nay apna 5 saal ka waqat poora kiya ho. Man nay jub say aankkh kkholi hay siraf chand aik ginnay chunnay chehray or naam sun-nay or daykkhnay ko millay han. Jub Koi halat zayadah he kharab ho jayen to phirr Mulak kay mahafaz mulak ki kaman sanbbhal laytay han. Hamaray mulak nay 60 saal kay dor man itnay marsahl laws or itni hakoomtayn (Wazir-e-Azam) daykkhin han keh shayad he kissi or kom ya mulak ko yeh tofique milli ho. Or hamara hall waisa ka waisa he uss GEEDARR(Jackal) ki tarrah hay, Jo bhook lagnay par apnay he payshab say gandi ki hui gajjar yeh keh kar uttha layta hay keh ISS GAJAR PAR PAYSHAB NAHEEN KIYA THAA. Kaya ghalat kiya hay hum nay ya kon sa gunnah kiya hay hum nay jiss ki saza Allah Tualla hamayn iss tarah kay Hukmrano ki shakal mayn day rajha hay. Yaad Rakkho iss Watan kay wafadaar Mahafaz or Mukhliss negehban siraf hum (Aawam) he ho saktay han. Na to inn Mazhab kay thaykaydaron nay mulak ko aaj tak kucch diya hay or na he inn chand ginnay chunnay Sayassi Rahnaamaon nay. Her aik ka dayera apnay zati mufaad kay gird ghhomta hay, or jab iss dayeray mayn koi bull aana shuroo hota hay to Siyassi Rahnama apni Party badal laytay han or Mazhabi Rahnama mazhab ko banyad bana kar hamayn larrwana shuroo kar daytay han.
-----------------TO BE CONTINUED----------------------

Add new comment

CAPTCHA
This question is for testing whether or not you are a human visitor and to prevent automated spam submissions.
Copyright (©) 2007-2019 Urdu Articles. All rights reserved.
Developed By Solaxim Web Hosting and Development Services
Affiliates: Urdu Books | Urdu Poetry | Shahzad Qais | Urdu Jokes One Urdu| Popular Searches | XML Sitemap Partners: UrduKit | Urdu Public Library

Urdu Articles Is One Of The Largest Collection Of Urdu Articles On Different Topics. You can read articles on topics like parenting, relationship, politics, How to do Things, Shopping Reviews, Life Style, Cooking, Health and Fitness, Islam and Spirituality... You can also submit your articles to get free publicity and fame on your published work. Keep Smiling......